1 Ἐγένετο δὲ ὡς ἡ ἡμέρα αὕτη καὶ ἦλθον οἱ ἄγγελοι τοῦ θεοῦ παραστῆναι ἔναντι κυρίου , καὶ ὁ διάβολος ἦλθεν ἐν μέσῳ αὐτῶν παραστῆναι ἐναντίον τοῦ κυρίου . 2 καὶ εἶπεν ὁ κύριος τῷ διαβόλῳ Πόθεν σὺ ἔρχῃ ; τότε εἶπεν ὁ διάβολος ἐνώπιον τοῦ κυρίου Διαπορευθεὶς τὴν ὑπ᾿ οὐρανὸν καὶ ἐμπεριπατήσας τὴν σύμπασαν πάρειμι . 3 εἶπεν δὲ ὁ κύριος πρὸς τὸν διάβολον Προσέσχες οὖν τῷ θεράποντί μου Ιώβ , , ὅτι οὐκ ἔστιν κατ᾿ αὐτὸν τῶν ἐπὶ τῆς γῆς ἄνθρωπος ἄκακος , ἀληθινός , ἄμεμπτος , θεοσεβής , ἀπεχόμενος ἀπὸ παντὸς κακοῦ ; ἔτι δὲ ἔχεται ἀκακίας · σὺ δὲ εἶπας τὰ ὑπάρχοντα αὐτοῦ διὰ κενῆς ἀπολέσαι . 4 ὑπολαβὼν δὲ ὁ διάβολος εἶπεν τῷ κυρίῳ Δέρμα ὑπὲρ δέρματος · ὅσα ὑπάρχει ἀνθρώπῳ , ὑπὲρ τῆς ψυχῆς αὐτοῦ ἐκτείσει · 5 οὐ μὴν δὲ ἀλλὰ ἀποστείλας τὴν χεῖρά σου ἅψαι τῶν ὀστῶν αὐτοῦ καὶ τῶν σαρκῶν αὐτοῦ · εἰ μὴν εἰς πρόσωπόν σὲ εὐλογήσει . 6 εἶπεν δὲ ὁ κύριος τῷ διαβόλῳ Ἰδοὺ παραδίδωμί σοὶ αὐτόν , μόνον τὴν ψυχὴν αὐτοῦ διαφύλαξον .
7 Ἐξῆλθεν δὲ ὁ διάβολος ἀπὸ τοῦ κυρίου καὶ ἔπαισεν τὸν Ιὼβ ἕλκει πονηρῷ ἀπὸ ποδῶν ἕως κεφαλῆς . 8 καὶ ἔλαβεν ὄστρακον , ἵνα τὸν ἰχῶρα ξύῃ , καὶ ἐκάθητο ἐπὶ τῆς κοπρίας ἔξω τῆς πόλεως .
9 Χρόνου δὲ πολλοῦ προβεβηκότος εἶπεν αὐτῷ ἡ γυνὴ αὐτοῦ Μέχρι τίνος καρτερήσεις λέγων 9a Ἰδοὺ ἀναμένω χρόνον ἔτι μικρὸν προσδεχόμενος τὴν ἐλπίδα τῆς σωτηρίας μου ; 9b ἰδοὺ γὰρ ἠφάνισταί σου τὸ μνημόσυνον ἀπὸ τῆς γῆς , υἱοὶ καὶ θυγατέρες , ἐμῆς κοιλίας ὠδῖνες καὶ πόνοι , οὓς εἰς τὸ κενὸν ἐκοπίασα μετὰ μόχθων . 9c σύ τε αὐτὸς ἐν σαπρίᾳ σκωλήκων κάθησαι διανυκτερεύων αἴθριος · 9d κἀγὼ πλανῆτις πλανῆτις καὶ λάτρις τόπον ἐκ τόπου περιερχομένη καὶ οἰκίαν ἐξ οἰκίας προσδεχομένη τὸν ἥλιον πότε δύσεται , ἵνα ἀναπαύσωμαι τῶν μόχθων καὶ τῶν ὀδυνῶν , αἵ με νῦν συνέχουσιν . 9e ἀλλὰ εἰπόν τι ῥῆμα εἰς κύριον καὶ τελεύτα τελεύτα . 10 ὁ δὲ ἐμβλέψας εἶπεν αὐτῇ Ὥσπερ μία τῶν ἀφρόνων γυναικῶν ἐλάλησας · εἰ τὰ ἀγαθὰ ἐδεξάμεθα ἐκ χειρὸς κυρίου , τὰ κακὰ οὐχ ὐποίσομεν ; ἐν πᾶσιν τούτοις τοῖς συμβεβηκόσιν αὐτῷ οὐδὲν ἥμαρτεν Ιὼβ τοῖς χείλεσιν ἐναντίον τοῦ θεοῦ .
11 Ἀκούσαντες δὲ οἱ τρεῖς φίλοι αὐτοῦ τὰ κακὰ πάντα τὰ ἐπελθόντα αὐτῷ παρεγένοντο ἕκαστος ἐκ τῆς ἰδίας χώρας πρὸς αὐτόν , Ἑλιφὰς ὁ Θαιμανὼν βασιλεύς , Βαλδὰδ ὁ Σαυχαίων τύραννος , Σωφὰρ ὁ Μιναίων βασιλεύς , καὶ παρεγένοντο πρὸς αὐτὸν ὁμοθυμαδὸν τοῦ παρακαλέσαι καὶ ἐπισκέψασθαι αὐτόν . 12 ἰδόντες δὲ αὐτὸν πόρρωθεν οὐκ ἐπέγνωσαν καὶ βοήσαντες φωνῇ μεγάλῃ ἔκλαυσαν ῥήξαντες ἕκαστος τὴν ἑαυτοῦ στολὴν καὶ καταπασάμενοι γῆν . 13 παρεκάθισαν αὐτῷ ἑπτὰ ἡμέρας καὶ ἑπτὰ νύκτας , καὶ οὐδεὶς αὐτῶν ἐλάλησεν · ἑώρων γὰρ τὴν πληγὴν δεινὴν οὖσαν καὶ μεγάλην σφόδρα .